إحساس

ليه الزمان اللي اتوجدت فًـ قلبه مش ليه

و قلبي مش شبه القلوب اللي حواليه

ليه بيوحشوني ناس

ما عادوش ما بين الناس

محتاجة اعيش إحساس

يروي عطش فيَّه

***

ليه الدموع حاسة انها جوايا مبكيّة

من غير ألم..  من غير فراق.. على روحي مكفيَّة

مالّة قوي من ناس

خايفة قوي على ناس

متحيّرة فْـ إحساس

تاعبني مِداريّة

***

ليه الكلام بقى هم.. كل حياتنا مشكيّة

و لا حد حاله بينصلح و لا حتّى فيه نيّة

كلّه بيشكي الناس

و يفتري عالناس

هوَّ فُصام إحساس

ولاّ ده عيب فيَّه