ذنبك

ترجع ؟!

ولا ما ترجعش !

ذنبك.. 

سد كل طريق

توب.. 

قلبي ما بيسمعش

بعدك..

يعجز التصديق

دانت لو جاي برسالة..

انا كافرة بيك

انت انسان ؟ .. استحالة

باشك فيك !

عمري..

كله ده ما يشفعش ؟

و انت

بتوبة تبقى بريء ؟!

حِنّ في سرَّك

حنّ في سرّك.. و اتخيِّل مهما اتخيِّلتْ

مش هيسُرَّك... ردُّه.. لو اتجنِّنْت و قلتْ

إوعى يا قلبي.. ما تخسرهوش
ماضي و عدّى .. ما تعيدهوش

كان قدَّامك.. ما اشتريتوش

إوعى تغُرَّك.. طيبته.. اتبدِّلْ و اتبدِّلتْ

***

كل بعاد و تلاقي

لينا قدر و مصير

و اللي ما بينّا و باقي

عشرة عمر بخير

و ان فاض بيّّ حنيني

ما باشوفه و بيجيني

و حاجات بتنسّيني

و حاجات صعبة كتير

***

لما انت مش قادر
سبته يبعد ليه

كان عاشق.. كان صابر
عالحب و لياليه

انسى يا قلبي خلاص
بينّا و بينه ناس
حابينه بإخلاص

و شايلهم في عنيه

حلم العمر

يا حلم صار بعد المنى جنَّة
ما اعرفش إيه بعده أنا اتمنَّى

يا صوت ملاك حاني كما النِّسْمَة
و عيون ذكية شقية مِبْتِسْمَة
و وش له ساعة الزعل رَسْمَة

و اعرف أنا تمثيله مالزَّنَّة

***

شايفاني باكبر و انت قدَّامي
و كإنها متعادة أيامي
حتى اللماضة و طلقك الحامي
و ساعات في بوسة فيها ميت (إنَّ)

***

بتجنيني كتير و بانويلك
لكن بادوب و اتخطف اجيلك
لو قلتِ (آه) حتى في تمثيلك
فيه أم لحظة خوف بتتأنَّى !

***

لو لسة فيه في الأمنيات واحدة
يبقى تكوني بنت مش جاحدة
و يكون زمانك غير دهو أهدى
و اقعد لفرحك صاحية مالحِنَّة
...

يا حلم صار بعد المنى جنَّة

ما اعرفش إيه بعده أنا اتمنَّى

فرَّحتهم فينا

فرَّحتهم فينا

و بقِت أسامينا

عناوين حكاياتهم

و نداري في عينينا

لو رحنا أو جينا

و يعلُّوا ضِحكِتهم

بقى تيجي من قلبك ؟

و تيجي فينا احنا ؟

احنا اللي كان تَعَبَك..

بنقول : مريَّحْنا

عشان نسكِّتْهُم

سمَّعْتِنا صوتْهُم

فرَّحتهم فينا

***

ياللي انت ناسينا

رجَّع ليالينا

حرام تضيَّعْهُم

البعد مش لينا

داحنا لبعضينا

ارجع و سمَّعهُم

حسدونا على شوقنا

و كنا خايفين

للعين تفرقْنا

و ما جاتش مالعين

...

فرَّحتهم فينا

***

من يوم ما حبِّينا

و همَّا حوالينا

متغيَّرة احوالهم

حتى امَّا خبِّينا

هوانا.. و دارينا

ما ريَّحوش بالهم

قالوا : الهوى كدبة

عايشينها يومين

و هتخلص اللعبة

و يفوقوا الاتنين

....

فرَّحتهم فينا

احضني حضن

احضني حضن

نسِّيني بيه

كل اللي شفته في البعاد

نسِّيني حزن

مليتني بيه

و قلب عوِّدته العناد

ما صْفيش و لو إنُّه في حضنك مش فاكرلك

ما يْجيش على بالُه تخون اللي آمنلك

احضني حضن

قوِّيني بيه

محتاجة اسامحَك.. محتاجاك

***

احضني حضن..
أول الأيام
أيام ما كان الجاي مِالأحلام

و تلومني لو خانت العيون دمعة
و تقولي : (تبقي فْـ حضني و تخافي ؟)

و الحضن كان بالحنان دافي
و كنت أخاف منها و من.. غيرها..
لا تبدله الأيام !


***

احضني حضن..
يجبُر المكسور
يمحي السواد.. يبدِلُه بالنُّور

كدِّبْ كلام سامعاه.. و مش سامعة
خايفة الزمان يجرحني بيك تاني

خلي الأمان يداويلي أحزاني
و امسح دموعي بطيبة.. و سايرها..
الجرح يملى بحور !

أول حاجة

أول حاجة بتتعلم تعشق فينا .. عينينا

و أول حاجة بتتألم لمّا بيجرحوا فينا

من كتر دموعنا

والقلب واجعنا

ولا حد سامعنا

ولا حاسس بينا

***

 اول حاجة بنعشقها.. 

ضحكة في وش بنرتاحله

ضحكة جميلة نصدقها.. 

فرحة معاها بنفرحله

قبل ما يوعدنا..

أحلامنا تاخدنا

و نلاقي هوانا..

عايش جوانا

احنا لوحدينا

***

آول حاجة بنفهمها.. 

لما نلاقي اللي فاهمنا

ان اللي زمان جرَّحنا.. 

لا عشقناه و لا عشقنا

نضحك على روحنا 

و نداوي جروحنا

و نلاقي هوانا 

عايش ويانا

في عينيه و عينينا

....

 أول حاجة بتتعلم تعشق فينا عينينا

...

إحساس

ليه الزمان اللي اتوجدت فًـ قلبه مش ليه

و قلبي مش شبه القلوب اللي حواليه

ليه بيوحشوني ناس

ما عادوش ما بين الناس

محتاجة اعيش إحساس

يروي عطش فيَّه

***

ليه الدموع حاسة انها جوايا مبكيّة

من غير ألم..  من غير فراق.. على روحي مكفيَّة

مالّة قوي من ناس

خايفة قوي على ناس

متحيّرة فْـ إحساس

تاعبني مِداريّة

***

ليه الكلام بقى هم.. كل حياتنا مشكيّة

و لا حد حاله بينصلح و لا حتّى فيه نيّة

كلّه بيشكي الناس

و يفتري عالناس

هوَّ فُصام إحساس

ولاّ ده عيب فيَّه

عايشين

لو راح يبقى نصيبنا 

و ان جه يبقى حبيبنا 

و لا حيرة تتعبنا 

يا هيرجع يا خلاص 

ليه دموع تسكن عينَّا 

و يعيش جوَّه سنينّا 

و هواه غايب عنَّا 

يمكن بقى لُه ناس 

و اذا كان فكَّر في فينا

ما هانتشي ليالينا 

هيجيلنا يلاقينا 

عالشوق و الإخلاص 

***

قال لينا و قلناله 

عشنا الحب بحالُه 

بس اتغيَّر حالُه 

و احنا زي ما احنا 

و اسنِّنينا عليه 

عايزين نفهم ليه 

عاند فينا و فيه 

ولا فكَّر يصالحنا

***

كان دايما يسألنا

إيه ممكن يجرالنا

لو مرَّة جه ليلنا 

و ما كنَّاش عاشقين 

و نقولُّه هنموت 

و ادي أيَّام بتفوت 

ما سمعناش له صوت 

و لا شفناه و عايشين 

واحدة فْـ حياتك

إيه اللي فكر قلبك اني

كنت يوم واحدة فْـ حياتك ؟

مش بعدت و غبت عني

ليه تدوَّر عاللي فاتك ؟

حتى عايزني ما الومشي

سيبني و ابعد.. سيبني و امشي

نفسي اقولك يا ريت ما جيتني

ولاّ كنت ياريت نسيتني

ولاّ حتى أنا ياريتني

ما كنت لحظة واحدة فْـ حياتك

***

من غير سؤال باين عليك

مجروح و زي ما جيت زمان

رجفة إيديك.. حيرة عينيك

فتنت و قالت عاللي كان

جاي تداوي الجرح عندي

طب و جرحي و ليل دموعي

جاي تقولّي بلاش تعاندي

فرحة في عينيكي برجوعي

حتى عايزني ما الومشي

سيبني و ابعد.. سيبني و امشي

نفسي اقولك يا ريت ما جيتني

ولاّ كنت ياريت نسيتني

ولاّ حتى أنا ياريتني

ما كنت لحظة واحدة فْـ حياتك

***

عايزنا نبدأ من جديد

و اللي فات أهو فات و راح

يا خوفي للأيام تعيد

الهوى و بعديه الجراح

 إيه اللي اتغيَّر فيك عشان

قلبي تاني يبقى ليك

دا انت راجع بالزمان

و اللي كان لسة ماليك

حتى عايزني ما الومشي

سيبني و ابعد.. سيبني و امشي

نفسي اقولك يا ريت ما جيتني

ولاّ كنت ياريت نسيتني

ولاّ حتى أنا ياريتني

ما كنت لحظة واحدة فْـ حياتك

نسيت صوتي !

نسيت صوتي ؟

نسيت إيه تاني في غيابي ؟

فاكر اسمي ولاّ نسيته هوّ كمان ؟

وانا اللي باقول..

ما نمتش ليلة بعذابي

أتاري الجرح مدّاوي كإنه ما كان

هاقولّك إيه !

ما ليَّاش حق في عتابي

غير انّى رجعت مالقيتشي فاضلّي مكان

***

لحق قلبك ؟ لحق ينسى ؟

لحق يلقى حبيب تاني ؟

و ياخدك شط فيه ترسى..

و ترمي حمل أحزاني ؟

فضلت أستنّى أشوفك جاي

وانا اللي مشيت هتيجي ازّاي

و جيتلك انا و ياريتني ما جيت

يا ريتني فضلت بسكوتي

نسيت صوتي ؟!

***

مش انت قلتلي مهما..

يكون بينّا مافيش بَعدي !

غلطت.. ندمت.. و الكلمة..

كانت على بالي طول بُعدي

رجعت و نفسي تسامحني

و لو باللوم هتجرحني !

و ما جرحتش.. و يا ريتك..

لكن ردَّك ده فيه موتي !

نسيت صوتي ؟!

يا مرايتي

يا مرايتي حسي بيَّ                  ردي بكلمة عليَّ

شوفي طبع سنين       بعد ما كان اللي كان

راجعة  تاني السنين     راجعه بأصحاب زمان

و حبيبي أكيد ما بينهم       إسمه سمعته منهم

بينا الليله معاد         خايفة مش عارفة ليه

يا ترى بعد البعاد         فاكر كان بينا إيه

و لا زحام الحياه           نساه شوقه و تاه

يا مرايتي حسي بيَّ                  ردي بكلمة عليَّ

محتارة أنهي أحلى          القول و لا السكوت

طب اقوله (فاكرني؟) ولاّ    اقوله (واحشني  موت)

خايفة وقت السلام           أنسى كل الكلام

خايفة صحابي يشوفوني   ساعة مالمح عينيه

يسبق لهفة عيوني          ياخدني بين إيديه

ينسى ان الناس معانا      يعيد قصة هوانا

يا مرايتي حسي بيَّ                  ردي بكلمة عليَّ

ألبس فستاني الأزرق   و اخد فوق كتفي شالي

و لا واحدة هتسرق            نظراته من قبالي

مش فاضل غير دقايق     ماشية بسرعة تضايق

رن التليفون جريت    من قبل ما ارد سامعة

صوته.. رديت.. صحيت   و فوق خدودي دمعة

أتاريه كان حلم بيه           يا ريتني شفته فيه

و لا حست مرايتي بيَّ             و لا ردت عليَّ

قلبي خلاص

و باقولك إيه اسمع بقى

قلبي لا عاد حلمه اللقا

و لا في البعاد..

بالمح دموع قلب اشتكى

منديله يغرق في البكا

قلبي خلاص غيرك لقى

***

شوفلك كلام
غير اللي قلته زمان..
و قلبي مصدَّقك

شوفلك كلام
و احلف عليه كمان..
و عمري ما اصدَّقك

ما تَعَبْشِ قلبك.. كتر كدبك.. تِعِبْتِلُه

ما زهِقْشِ من كلمة بحبك..  زهقتله

***

راجعلي ليه ؟..
عشان تقول للناس..
(نِسْيِتْ حُبِّنا)

و نسِيتُه ليه ؟..
عشان لقيت إخلاص..
و ليل عشق و هَنَا

وليه اسامحك.. و انسى جرحك..  يا وَفِي !

دا انا نفسي كل ما اشوف مَلامْحَك.. تِخْتِفِي

إنساني

إنساني عشان أقدر أنسى

بافتكرك من همسة لهمسة

لك دنيا و لك ناسك فيها

و خلاص سايباك

واللي انت حاببها بتوفيها

لكن انا حبَّاك

و دي حاجة لا يمكن تنفيها

إن انا جوّاك

و بافكَّر فيك لحظة ما تفكّر فيّه

و الحلم اللي تشوفه بالاقيه في عنيَّه

و باقوم من حلم إيديك فيه لامسة إيديّه

بدفاهم و حياتك حاسّة

إنساني عشان أقدر أنسى

***

قلتلي هتغيب و اهو غِبْت.. و لسّه معايا

و اتاريك في بعادك سبت.. غُناك جوّايا

و في بعدك باسمع.. و انت بتقرالي

ما انا عارفة الغنوة اللي انت كاتبهالي

لو ندم الدنيا ندمت.. عليك ما كفاية

***

و مالكش في بعدنا ذنب.. أنا الغلطانة

و ما شفتش بعدك حب.. و انا الندمانة

و حكملي نصيبي انَّك ما تكونشِ نصيبي

و اتجنِّن لما اتخيِّل انَّك كنت حبيبي

و احلفك إنَّك قلب.. عشق بأمانة

...

إنساني عشان أقدر أنسى

بافتكرك من همسة لهمسة

غلطتي

غلطتي مش غلطتك

غلطتي أنا مالبداية

و الظروف جت خَلِّتَكْ

تبقى جزء من الحكاية

كنت شايفة.. انك معايا و مش معايا

كنت عارفة.. ان اللي عندك غير هوايا

قلت (لسة !)..

رغم إني كنت حاسة..

كنت حاسة في يوم هتبقى دي النهاية

***

كنت افكر قلبي ليه

إن حبه هينتهي

مين يهون فرحه عليه

مين لدمعه يشتهي

فرحة بعدت أيوة عني

بس باقية فْـ كل لمحة

و ان نسيتها أو نسيتني

مش هاقولك غير مسامحة

غلطتي مش غلطتك

غلطتي أنا مالبداية

***

عشت لحظة حب حلوة

من زمان كان نفسي اعيشها

و الدموع من بعد غنوة

غير دموع جرحت رموشها

يمكن ابكي لمّا افكَّر

قلبي بيك في كل دقَّة

ذكريات بتفوت مش اكتر

بس مش ندمانة لأَّ

غلطتي مش غلطتك

غلطتي أنا مالبداية

حاجات صغيَّرة

حاجات صغيَّرة..

ما تاخدش غير ثواني

لكن عندي بعمري..

تملك بيها كياني

و اما بتغيب عليَّ

أو تبعد يوم بعيد

ألقاها بين عينيَّه

راجعالي من جديد

و افتكرك يا حبيبي..

و اعيشها بروحي تاني

***

و تجيلي ساعات بوردة

و تكون مريت في بالي

و مافيش ليها مناسبة

و افضل لحظتها شاردة

و اسأل ليه جبتهالي

و انا مش قصدي محاسبة

تضحك و تقولِّي عادي

وردة لأجمل أيادي

و القى شوقك آسرني

كفاية انك فاكرني

في حاجات صغيَّرة..

لو حتى يادوب ثواني

***

و كتير أيام تفوت

مانشوفش بعضنا

مع إني فْـ حلمي شفتك

و القي تليفون و صوت

كإنه فات سنة

بتقولّي اني وحشتك

و اسكت مع إني سامعة

نزلت مالفرحة دمعة

و القى شوقك آسرني

كفاية انك فاكرني

في حاجات صغيَّرة..

لو حتى يادوب ثواني

مش غرور

صدَّقني.. لا لا مش غرور

لو يعاندك قلب واحدة

شفت عمرك وردة من بين الزهور

فتَّحتلك مرة واحدة

ولاَّ حتى الشمس لما تبان بنور

مش بتشرق واحدة واحدة

و الهوى زي الشروق

كل تأخيرة بشوق

***

اكتب و غنّيلي

و اعمل مانيش سامعة

ما انا برضه طول ليلي

على خدّي ميت دمعة

شايفة.. و انا باحلم

حكايات قصاد عيني

خايفة في يوم اندم

و غيري يحكيني

***

عشان تلاقيني

في الحضن ده دايبة

اوفيلي خلّيني

في غيابي مش غايبة

أنا في الحياة منّك

بس الغرام منّي

عايز يدوب قلبك

لازم تطمِّنّي

صدَّقني لا لا مش غرور

لو يعاندك قلب واحدة

في صيف تاني

في صيف تاني قابلته ............... و لمحته من بعيد

و جريت عليه سألته ............... و الشوق جاي من جديد

فاكرني يا ترى ............... من سنة فاتت هنا

ولاّ نسيت إيه جرى ............... وسط شهور السنة

قبل ما يبدأ كلامه ............... إيده كانت في إيدي

سابق لومي بسلامه ............... حسيت اليوم ده عيدي

و أخدني معاه في إيده ............... لمكانّا بتاع زمان

نحيي الماضي نعيده ............ و اتاريه ما نسيش كمان

دقيقة و يمكن اكتر ............... لسه ما ردِّش عليَّه

و انا كل ثانية افكَّر .......... و عنيه سارحة فْــ عينيَّه

قال لي.. أحكيلُه عنِّي ............... قلت.. احكي إنت قَبْلَه

سكت و فْـ لحظة عيني ............... لمحت في إيده دِبله

لا قدرت اسأل و لا ابكي ........... قال لي.. و لا يوم نسيني

كان لسه بادي يحكي ............... لمح الدبلة في عيني

قال لي.. استنِّي هاوَضَّحْ ............... جري دمعي فوق خدودي

قلت.. ما فيش داعي تشْرَحْ ........... و لا فيش داعي لوجودي

سبته و مشيت لوحدي ............... مش شايفه شيء قصادي

غير دنيا خانتلي وعدي ............... فاكراها جت تراضي

و فْـ آخر الصيف قابلته ............... و لمحته من بعيد

فرحانة إني شفته ............... قلبي المجروح عنيد

قرَّب.. قرَّبت منُّه ............... و أنا عارفة إيه حصلُّه

أخبار وصلتني عنه ............... زي ما عنِّي وصلُّه

عديت جنبه.. لقيت ............... مافيش دبله فْـ إيديه

ورِّيته فْـ إيدي دبله ............... جرحت قلبه و عينيه

و مشيت بعد امَّا شافها ............... بيسأل إيه اللي فيها

لو كان يلمح حروفها ............... كان شاف إسمه عليها

ودعت الصيف ساعتها ............... شمس و رملة و ميَّة

شِلت الدبلة رميتها ............... وسط الموجة اللي جاية

شيء غريب

لو لمحت دموعي أرجوك إوعى تحكي

عن ظروف فرَّقت جاي منها تشكي

و ان أيامنا هتفضل بينا ذكرى

نفتكرها لو هييجي ألف بكرة

للأسف.. ما عدتش اقدر اصدقك.. لو حتى تبكي

***

ياما قالوا قـلـبـه بـايــع.. قـلـت شاري

قالوا فينه.. قلت طيفه فْـ حلمي جاني

كنت فاكراك.. جاي تداوي الجرح اتاري

ان الهوى وياك هيبقى جرح تاني

كان كل ذنبي اني بهواك متأكدة

ان الوعود مش بالكلام دي فْـ قلبنا

و اما سألتك قلت لا لا مش كدة

ما وعدتكيش في يوم نكون لبعضنا

شيء غريب.. معقولة في عيونك دموع..

و انت بتقتل أحلى شيء بين الضلوع

للأسف.. ما عدتش اقدر اصدقك.. لو حتى تبكي

***

مش هاقوللك إني هانسى فْـ يوم و ليله

اللي فاكراه كان هيبقى العمر كله

بس مش هتكون حياتي مستحيلة

هالقى قلب أكيد ياخدني يوم في ضله

بكرة يصبح كله ماضي ألبوم صور

واللي انخلق في القلب يوم يبقى عدم

و ان كان فيه شيء جوة جوايا انكسر

هتحسه يوم ما تفيدش فيه لحظة ندم

شيء غريب.. معقولة في عيونك دموع..

ما فات خلاص وقت المسامحة والرجوع

للأسف.. ما عدتش اقدر اصدقك.. لو حتى تبكي

مسامحاك.. و عود

مسامحاك.. و عود..

نجدِّد وعود..

خلفْها الزمان

يهون الوجود..

و دمع الخدود..

و انا اهون كمان

و لا اتمنَّى لحظة تعيشها في ضيقي

لإني بحبك.. بحبَّك حقيقي

***

هانسى اللي فات..

كإنه فُتات..

خدُه الريح و طار

و ارجَّعْ ساعات..

قتلْها السُّكات..

في ليل كُلُّه نار

و عمري ما افكَّر أردّ الجِراحْ

و عمري اللي خدته فِداك مهما راح

مسامحاك.. و عود..

***

بحبَّك بضعفي..

و محتاجة قلبَك..

نسيت العذاب

و لا يوم هاعاتبك..

كفاية ابقى جنبَك..

كفاياك غياب

ما عنديش مكان لغيرك ياخدني

ما قلبي معاك.. و قلبَك في حضني

مسامحاك.. و عود..

نهاية الحكاية

عرفت ليه ساعتها..

ما هزنيش بعدك ؟

و دمعتي داريتها..

لما رخص وعدك

عشان اديت لآخر..

ما عندي فـ هوايا

و اللي مافرقشِ عنده..

ما يفرقش معايا

عشان ما كانش بعدك..

نهاية الحكاية

ما هيّ دي بقيتها

رجعت و لوحدك

***

رجعت.. عشان مشيت

من غير ما تقول وداع

نسيت.. قسيت.. جريت

ورا وهم و خداع

حبيت ؟ أنا حبيت

و نسيت و لا استنيت

عشان اديت لآخر.. 

ما عندي فـ هوايا 

و اللي مافرقشِ عنده.. 

ما يفرقش معايا 

عشان ما كانش بعدك.. 

نهاية الحكاية 

ما هيّ دي بقيتها 

رجعت و لوحدك 

***

رجعت عشان تعيش

لحظة ندم اللي راح

ما القصة ما تنتهيش

من غير رد الجراح

لكن دموع مافيش

أصلك ما تتبكيش

عشان اديت لآخر.. 

ما عندي فـ هوايا 

و اللي مافرقشِ عنده.. 

ما يفرقش معايا 

عشان ما كانش بعدك.. 

نهاية الحكاية 

ما هيّ دي بقيتها 

رجعت و لوحدك 

تحت العيون

تحت العيون

سهر الليالي كلها

جوه العيون

كلمة (بحبك) قلتها

شفت العيون

لكن ما شفتش قلبها

كان صعب و انا شايفاك

وردك ماليه أشواك

تفضل في عيني ملاك

لما تخون

قلبي يآمنـلك بعدها

***

أنا مرة غلطت و بس

كدبت فـ قلبي الحس

و كلام حواليه بهمس

و ليالي حيرة و نار

مش هاغلط تاني بقلب

اديته بطيبة و حب

رديته بجرح و صعب

أنسى إنك غدار

***

ساعتها ازاي فكرت

بررت بإيه و قدرت

ولاّ بوهم اتصورت

الظلم مالوهش حساب

كان مهما يطول الوقت

و تجيلي تقول اشتقت

زي ما جيتلي دلوقت

هيبان انك كداب

***

تحت العيون

سهر الليالي كلها

جوه العيون

كلمة (بحبك) قلتها

شفت العيون

لكن ما شفتش قلبها